എഴുത്തിനു വിലയോ?
നവമാധ്യമത്തിന്റെ വരവോടെ എഴുത്തിലേക്കു കടന്നവർ അനവധിയാണ്. പ്രൊഫഷണൽ എഴുത്തുകാരുടെ മണ്ഡലത്തിലേക്കാണ് ഈ പുതിയ എഴുത്തുകാരുടെ വേലിയേറ്റമുണ്ടായത്. എഴുതിക്കൂട്ടുന്ന രചനകളുടെ ബാഹുല്യം, വായനയെ സീരിയസ് ആയി കാണുന്നവർക്കു തലവേദന സൃഷ്ടിച്ചിട്ടുണ്ട്. സോഷ്യൽ മീഡിയയിൽ കുമിഞ്ഞു കൂടുന്ന കഥയും കവിതയും എണ്ണമറ്റതാണ്. ഓരോ ദിവസവും മലയാളത്തിൽ ആയിരത്തിനു പുറത്തു കഥകളും കവിതകളും ഓൺലൈൻ മീഡിയയിലൂടെ പുറത്തുവരുന്നു. വളഞ്ഞുകെട്ടിയ സാഹിത്യ ഗ്രൂപ്പുകൾ അവരുടെ നിയമങ്ങളുമായി ഈ പുതുമുഖ എഴുത്തുകാരെ ഒരു സാങ്കല്പിക സുഖവാസ കേന്ദ്രത്തിലൂടെ നയിച്ചു മുന്നേറുന്നു. എങ്കിലും എടുത്തുപറയേണ്ടകാര്യം, നിരന്തരമുള്ള എഴുത്തിലൂടെ പലരുടെയും എഴുത്തിന്റെ നിലവാരം വർദ്ധിക്കുന്നു എന്നതാണ്. ചിലപ്പോളെങ്കിലും അറിയപ്പെടുന്ന എഴുത്തുകാരുടെ രചനയെ മറികടക്കുന്ന വിശിഷ്ടമായ (outstanding) രചനകൾ ഈ അമച്വർ എഴുത്തുകാർ കുറിച്ചിടുന്നു. അതിനു പലപ്പോഴും അർഹമായ എത്തപ്പെടലോ (reach), അംഗീകാരമോ, പ്രതിഫലമോ കിട്ടാറില്ല . എങ്കിലും ഇത് ആശയ്ക്കു വക നൽകുന്നു. പ്രൊഫഷണൽ എഴുത്തുകാർക്കു ലഭിക്കുന്ന പ്രതിഫലം പലപ്പോഴും പുറത്തുപറയാൻ കൊള്ളില്ല. (പൈങ്കിളി സാഹിത്യമ...
